Астанада блогшылар шаңғымен жарысты

Бекболат Тілеуханның бастамасымен, Намыс журналының ұйымдастыруымен бүгін Астанада, Есіл өзенінің үстінде астаналық блогшылар арасында шаңғыдан жарыс өтті. Барлығы жеті блогшы қатысқан бұл жарыста админдеріңіз бірінші орын алды. Екінші болып мәреге Жанасыл Болатбек, үшінші болып Рахат Жақсыбай келді. Қыздардан бірінші орынды Кәмшат Тасболат алды. Жүлдегерлерге бағалы сыйлықтар берілді, қалған қатысушылар да сыйлықсыз қалмады. Жарыстан кейін Намыс журналы жігіттері керемет дастархан ұйымдастырып жіберді, шәй ішіп, дәмнен ауыз тигеннен кейін марапаттау рәсімі болды. Жалпы жарыс алғаш рет өткенімен ұйымдастыру жағы күшті болды. Бекболат ағамызға және ұйымдастырушы жігіттерге рахметімді айтамын. Ал енді Нұрғисаның түсірген суреттерімен танысып шығайық, видеоақпаратпен кейін өзі бөлісе жатар. P.S екінші орын алған Жанасыл маған ренжіген сияқты, құлап қалған кезімде көмектеспедің деп. Мұның спорттық жарыс екенін ескерте отырып, құламаған жағдайда бірінші орын алар едім деп ойлауын қарсыластың мүмкіндігін бағаламау ретінде қабылдап, өкпесінің орынсыз екенін айта отырып, бұл қателігін жастығына, тәжірибесіздігіне бергім келіп отыр.