Қан қысымын не көтереді? Нені азайтқан дұрыс?

Қысым туралы әңгіме басталса, біреу кофені кінәлайды, біреу тұзды, енді бірі "бәрі стресстен" дейді. Бірақ қысымның жиі жоғарылауын бір ғана тағаммен түсіндіру қиын. Тұқымқуалаушылық, артық салмақ, аз қозғалу, тамақтану мен алкогольдің де үлесі болуы мүмкін.

Ас мәзірінде алдымен тұзға қараған жөн. Тек тамаққа өзіміз қосатын тұзға емес: шұжық, тұздалған өнімдер, чипсы, дайын тұздықтар мен тез дайындалатын кеспенің құрамына да. Қаптамадағы тұз немесе натрий мөлшерін қарауды әдет қылған жөн.

Алкогольді, соның ішінде сыраны да азайтқан дұрыс. "Қан тамырын кеңейтеді" деп қысымды емдеу үшін ішуге болмайды. Көкөніс пен жемісті көбейту, тұзды азайту және тұрақты қозғалу қысымды бақылауға көмектеседі. 

Кофеге келгенде бәріне бірдей тыйым жоқ. Кофеин кей адамдардың қысымын уақытша көтеруі мүмкін, әсіресе оны сирек ішетіндерде. Қою шай мен энергетиктерде де кофеин бар. Сезімтал болсаңыз, мөлшерін азайту немесе кофеинсіз кофеге ауысу жайын қарастыруға болады. 

Қысым көтерілгенін үнемі сезе бермейміз. Сондықтан болжамнан гөрі өлшеп, нәтижесін жазып жүрген пайдалы. Жиі жоғары болса, дәрігерге көрінген дұрыс; тағайындалған дәріні өз бетіңізше тоқтатпаңыз.