Зейнетақы қорындағылар "бітімгершілікке" шақырып жатыр

Зейнетақы қорындағы ақшаңыздың болашағы жайлы ойланып көрдіңіз бе? Әлде босқа сандырақтап жүрміз бе? Өткен сенбіде студенттерімді Республика Зейнетақы қорының семинарына апарып, біраз көзім ашылғаны бар. Содан ақшамды инвестициялап жатқан компанияның сайтына кірсем… Құдай сақтасын, қазақша бір әріп жоқ!!! Содан олай-бұлай ақтарып, жазатын жеріне ой-пікірмді жазып кеткенмін. Бір сағаттан соң қалтафоныма хабарласып тұр. Шағымыңыз орынды, анау-мынау деп… қаным басыма шапты. Ай сайын халықтың маңдай термен тапқан айлығының 10%-ын қоныштарыңа басып отырсыңдар да, оларға ләм-мим деп қазақша ақпарат та бермейсіңдер! «Біздің сайт тұрған платформамыз қазақша әріп қолдамайды» деп сылтаурата бастап еді, «ертегі айтпа» деп аузына құм құюға тура келді. Ниеттері әу баста орысша болғаны аян болып тұр ғой. Сол жігіттен жаңа ғана хат келді. Қаласаңдар, қазақ тілінде Зейнетақы қорына байланысты арнайы семинар өткізіп берейік. Қандай сұрақтардың жауабын білгіңіз келеді деп жатыр. Алматылық блогшылар, сенбі сайын жиналушы едік қой. Алдағы аптада немесе осы апта соңында сол жақта жиналсақ, қалай қарайсыңдар? Басқа да журналистер немесе қарапайым салымшылар болса, хабар берерсіңдер. Ниеттерің болса, семинарларына барып қайтайық! Өз ақшамызды өзіміз қадағалап отырмасақ, құтырып барады екен :) Сурет мына жерден алынды